ಮಧ್ಯಪ್ರದೇಶ: ‘ಏಕಾಂಗಿಯಾಗಿ ನಾನೊಬ್ಬನೇ ಏನನ್ನು ಸಾಧಿಸಲು ಸಾಧ್ಯ?’ ಎಂದು ಸುಮ್ಮನೆ ಕೂರುವವರೇ ಹೆಚ್ಚು. ಆದರೆ, ಮಧ್ಯಪ್ರದೇಶದ 21 ವರ್ಷದ ಯುವಕನೊಬ್ಬ ಒಂಟಿ ಸಲಗದಂತೆ ನಿಂತು ಕಸದ ತೊಟ್ಟಿಯಾಗಿದ್ದ ಇಡೀ ನದಿಯನ್ನೇ ಸ್ವಚ್ಛಗೊಳಿಸಿ ಇಡೀ ವಿಶ್ವದ ಗಮನ ಸೆಳೆದಿದ್ದಾನೆ.
ಯಾರಿವನು ‘ಬಿಟ್ಟು ತಬಾಹಿ’? ಮಧ್ಯಪ್ರದೇಶದ ಬಿಯೋರಾ (Biaora) ನಿವಾಸಿಯಾಗಿರುವ 21 ವರ್ಷದ ಬಿಎಸ್‌ಸಿ ವಿದ್ಯಾರ್ಥಿ ಸುರೇಂದ್ರ ಸಿಂಗ್ ಚೌಧರಿ. ಸಾಮಾಜಿಕ ಜಾಲತಾಣಗಳಲ್ಲಿ ಈತನ ಹೆಸರು ‘ಬಿಟ್ಟು ತಬಾಹಿ’ (Bittu Tabahi). ಪ್ಲಾಸ್ಟಿಕ್ ಕಸ ಮತ್ತು ತ್ಯಾಜ್ಯಗಳಿಂದ ತುಂಬಿಹೋಗಿದ್ದ ಊರಿನ ಅಜ್ನಾರ್ (Ajnar) ನದಿಯನ್ನು ಶುಚಿಗೊಳಿಸಲು ಈತ ಏಕಾಂಗಿಯಾಗಿ ಕಣಕ್ಕಿಳಿದಿದ್ದ. ಯಾವುದೇ ಸಂಪನ್ಮೂಲಗಳಿಲ್ಲದೆ, ತನ್ನ ಆರೋಗ್ಯದ ಮೇಲಾಗುವ ಅಪಾಯಗಳನ್ನೂ ಲೆಕ್ಕಿಸದೆ ಬರಿಗೈಯಲ್ಲೇ ತಿಂಗಳುಗಟ್ಟಲೆ ಕಸ ತೆಗೆಯುವ ಕೆಲಸ ಮಾಡಿದ್ದಾನೆ.
ಹುಚ್ಚ ಎಂದವರಿಗೆ ತನ್ನ ಕೆಲಸದಲ್ಲೇ ಉತ್ತರ ಕೊಟ್ಟ! ಒಬ್ಬನೇ ನದಿಗೆ ಇಳಿದು ಕಸ ಎತ್ತುತ್ತಿದ್ದ ಈ ಯುವಕನನ್ನು ನೋಡಿ ಊರವರು ಆಡಿಕೊಂಡಿದ್ದರು, ಟೀಕಿಸಿದ್ದರು. ಆದರೆ ಅದ್ಯಾವುದಕ್ಕೂ ತಲೆಕೆಡಿಸಿಕೊಳ್ಳದ ಬಿಟ್ಟು, ನದಿಯನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿ ಅದರ ‘ಮೊದಲು ಮತ್ತು ನಂತರದ’ (Before-and-after) ವಿಡಿಯೋಗಳನ್ನು ಇನ್ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದ. ಈತನ ಛಲವನ್ನು ಕಂಡು ಎಚ್ಚೆತ್ತ ಸ್ಥಳೀಯ ಆಡಳಿತ ಮತ್ತು ಸರ್ಕಾರ ಕೂಡ ನದಿಯ ಉಳಿವಿಗೆ ಮುಂದಾಗಿದೆ.
ಹುಡುಕಿ ಬಂತು ‘ದಿ ಓಷನ್ ಕ್ಲೀನ್‌ಅಪ್’ ಆಫರ್! ಬಿಟ್ಟು ತಬಾಹಿಯ ಈ ವಿಡಿಯೋಗಳು ಜಾಗತಿಕ ಮಟ್ಟದಲ್ಲಿ ವೈರಲ್ ಆಗಿವೆ. ಸಮುದ್ರದ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಸ್ವಚ್ಛಗೊಳಿಸುವ ವಿಶ್ವದ ಅತಿದೊಡ್ಡ ಸಂಸ್ಥೆಯಾದ ‘ದಿ ಓಷನ್ ಕ್ಲೀನ್‌ಅಪ್’ (The Ocean Cleanup) ಸಂಸ್ಥಾಪಕ ಮತ್ತು ಸಿಇಒ ಬೋಯನ್ ಸ್ಲಾಟ್ (Boyan Slat) ಅವರ ಗಮನವನ್ನೂ ಈ ವಿಡಿಯೋ ಸೆಳೆದಿದೆ. ಬಿಟ್ಟು ಅವರ ಸಮರ್ಪಣಾಭಾವಕ್ಕೆ ಬೆರಗಾದ ಬೋಯನ್ ಸ್ಲಾಟ್, “ಬಂದು ನಮ್ಮ ಸಂಸ್ಥೆಯಲ್ಲಿ ಕೆಲಸ ಮಾಡಿ” ಎಂದು ನೇರವಾಗಿ ಉದ್ಯೋಗದ ಆಫರ್ ನೀಡಿದ್ದಾರೆ!
ನಿಜವಾದ ಉತ್ಸಾಹ ಮತ್ತು ಸಮಾಜಮುಖಿ ಕೆಲಸಗಳು ಗಡಿಗಳನ್ನು ಮೀರಿ ಜನರಿಗೆ ಹೇಗೆ ಸ್ಫೂರ್ತಿಯಾಗಬಲ್ಲವು ಎಂಬುದಕ್ಕೆ ಸುರೇಂದ್ರ ಸಿಂಗ್ ಅವರ ಈ ಸಾಧನೆಯೇ ಅತ್ಯುತ್ತಮ ನಿದರ್ಶನ.
